ABŞ hərbçiləri üçün minaatan atəşini idarə etmək xeyli asanlaşacaq.

Bu, minaatan atəşini birbaşa smartfon vasitəsilə koordinasiya etməyə imkan verən yeni proqram təminatı sayəsində mümkün olacaq.

"Mortars App" adlandırılan bu proqram müasir və etibarlı arxitektura əsasında hazırlanıb, həmçinin döyüş şəraitinə uyğunlaşdırılmış rahat interfeysə malikdir. Tətbiq "Windows" və "Android" də daxil olmaqla müxtəlif əməliyyat sistemləri ilə uyğunlaşdırılıb ki, bu da onu çöl şəraitində geniş çeşidli cihazlarda istifadə etməyə imkan verir.

İri və qorunan noutbuklar tələb edən köhnə "Mortar Fire Control Software" sistemlərindən fərqli olaraq, yeni "Mortars" tətbiqi adi telefon və planşetlərdə rahat işləyir. Proqram bütün zəruri funksiyaları bir paketdə birləşdirir. Gözlənilir ki, tətbiqin gələcək yeniləmələri ənənəvi sistemlərlə müqayisədə daha az hesablama resursu tələb edəcək və bu, yeni rəqəmsal imkanların birbaşa ön cəbhədəki döyüşçülərə daha sürətlə çatdırılmasına kömək edəcək.

Tətbiqin işlənməsinə rəhbərlik edən kompüter mühəndisi Culiya Qustafson bildirib ki, komandası artıq daha müasir proqram həlləri hazırlayır.